مؤمن کا طرزِ زندگی کیسا ہوتا ہے؟

مجیب: سابقہ امیرِ جماعت محمد حنیف صاحب (رحمتہ اللہ علیہ)

:سوال

مؤمن کا طرزِ زندگی کیسا ہوتا ہے؟

:جواب

مومن، داعیِ حق، مجاہد ہوتا ہے، سہل پسند، عیش پسند نہیں ہوتا۔ اللہ کے رسول صلی اللہ علیہ وسلم اور صحابہ کرام نے جتنی آزمائشیں برداشت کی ہیں، وہ ہمارے اور آپ کے لیے نمونہ ہیں۔ ہم اس بات کے دعویدار ہیں کہ ان کے راستے پر چلیں، ان کا جیسا انجام ہو، انہی کی جیسی آخرت ہو، تو پھر ہمیں سہل انگاری کو چھوڑ کر، ترک کر کے، خیرباد کہہ کر، تھوڑا سا مشقت والا، مجاہدانہ انداز اختیار کرنا چاہیے۔ مومن مجاہد ہوتا ہے۔

اللہ کے رسول صلی اللہ علیہ وسلم نے غزوہ احزاب کے موقع پر جب یہ مشورہ ملا کہ جنگ خندق کھود کر کرنا چاہیے، سلمان فارسی رضی اللہ تعالیٰ عنہ کے مشورے پر، تو صحابہ کرام کو خندق کھودنے کا حکم دیا گیا۔ نبی صلی اللہ علیہ وسلم خود بھی ان میں شامل تھے۔ بھوک پیاس کا بھی دور تھا، پیٹ سے پتھر بھی بندھے ہوئے تھے، لیکن خندق کھودتے رہتے تھے۔ اور خندق کھودتے ہوئے زبان پہ اشعار تھے

 اللہم لا عیش إلا عیش الآخرۃ

اے اللہ! زندگی آخرت کی زندگی ہے بس، یہ زندگی امتحان کی زندگی ہے، سہل انگاری اور تعیش کی زندگی نہیں ہے۔

کوئی بیمار ہو، عذر ہو، وہ تھوڑا سا کر لے ریسٹ، ضرور کر لے، لیکن ہمارے نوجوان ساتھیوں کو ہمت سے کام لیتے ہوئے، ہمت سے کام لیتے ہوئے پورے انہماک کے ساتھ پروگرام میں حصہ لینا چاہیے اور پوری طرح متوجہ رہنا چاہیے، اس میں دلچسپی لینا چاہیے۔ کوئی لکھنے کی بات ہو لکھیں اور غور سے سنیں ہر بات کو۔ جہاں بھی وضاحت مطلوب ہو تو اشارہ کریں، لکھ کے بھیجیں تو ان شاءاللہ مزید وضاحت کی جائے گی۔ اللہ تبارک و تعالیٰ ہمیں ہر قسم کے شر سے بھی محفوظ رکھے اور اس کا حق ادا کرنے کی اور اس کو کامیاب بنانے کی توفیق عطا فرمائے۔ آمین۔