اعتکاف کے دوران موبائل رکھنا کیسا ہے؟

مجیب: سابقہ امیرِ جماعت محمد حنیف صاحب (رحمتہ اللہ علیہ)

:سوال

اعتکاف کے دوران موبائل رکھنا کیسا ہے؟

:جواب

ہم تو اس کو پسند نہیں کرتے ہیں۔ اعتکاف دس دن کے لیے آپ کر رہے ہیں، تو آپ دنیا سے کٹ جائیے، صرف اللہ کے ذکر کے لیے، تلاوتِ قرآن کے لیے، حدیث کے مطالعے کے لیے اور قیام کے لیے۔ قیام اللیل، نوافل کی ادائیگی کے لیے، اس کے لیے آپ مخصوص کیجیے۔

اور آپ کچھ پروگرام بنائیں کچھ حفظ کرنے کا، قرآن پڑھنے کا، دہرانے کا، تفسیر کا مطالعہ کرنے کا، ترجمے کا مطالعہ کرنے کا، تو یہ پروگرام بنائیے اپنے اعتکاف کے لیے، اپنے رمضان کے لیے۔ اس میں آپ کا وقت گزرنا چاہیے، یہ ہماری انفرادی عبادت کا مہینا ہوتا ہے، ہماری تربیت کا اور تزکیۂ نفس کا مہینا ہوتا ہے۔ اس کام کے لیے ہوتا ہے، آپ اس کو کریں گے، استعمال کریں گے اس دورانیے کو، تو آپ کے دل کو حقیقی مسرت ہوگی، آپ کو بہت خوشی ہوگی، اطمینانِ قلب حاصل ہوگا اور آپ بہتر محسوس کریں گے آئندہ سال کے لیے اپنے آپ کو۔

موبائل وغیرہ رکھنے سے آپ، وہ آپ کی دنیا پھر بھی رہے گی، ٹیلی فون آتے رہیں گے، گھر والوں کے بھی آتے رہیں گے، دوست احباب کے بھی آتے رہیں گے۔ آپ کچھ کر نہیں سکتے پھر تو، اس لیے گھر میں چھوڑ کے آئیے موبائل کو، نہ رکھیے، کبھی کوئی ضروری بات ہو تو گھر والے موبائل بھیج کے آپ کو کوئی بات کرا دیں، کوئی مشورہ کر لیں، وہ اور بات ہے ورنہ کوئی ضرورت نہیں ہے، دس دن تک آپ بالکل اپنا آپ سلسلہ منقطع رکھیے گھر والوں سے، دنیا سے بالکل، زیادہ بہتر یہی ہے۔