وحدت الوجود وہ نظریہ ہے جس میں کہا جاتا ہے کہ اللہ اور مخلوق ایک ہی حقیقت ہیں۔ یہ تصور تصوف کے مکاتب میں پایا گیا، مگر توحید کے اصول کے مطابق یہ سراسر باطل ہے۔ اسلام کا اصل عقیدہ یہ ہے کہ اللہ خالق ہے اور باقی سب مخلوق، ان کے درمیان کوئی وحدت یا اختلاط نہیں۔
قرآن میں اللہ تعالی نے فرمایا کہ
لَيْسَ كَمِثْلِهِ شَيْءٌ وَهُوَ السَّمِيعُ الْبَصِيرُ
اس جیسی کوئی چیز نہیں، اور وہ خوب سننے والا، خوب دیکھنے والا ہے۔ الشورى 11
یہ آیت واضح کرتی ہے کہ اللہ اپنی مخلوق سے بالکل الگ اور برتر ہے۔ اگر وحدت الوجود کو مان لیا جائے تو اللہ اور مخلوق ایک ہی قرار پائیں گے، جو اس آیت کے خلاف ہے۔ وحدت الوجود کا عقیدہ اللہ کی الوہیت اور کبریائی کو مخلوق میں گھلا دیتا ہے۔ یہ نہ صرف بدعت ہے بلکہ شرک کی جڑ ہے، کیونکہ یہ مخلوق کو الوہیت میں شریک کرتا ہے۔
نصاریٰ نے یہی غلطی کی کہ عیسیٰؑ کو اللہ یا اللہ کا جزء مان لیا۔ مشرکین نے اپنے معبودوں کو الوہیت میں داخل سمجھا۔ وحدت الوجود اسی گمراہی کی جدید شکل ہے۔
رسول اللہ ﷺ نے فرمایا کہ
اللَّهُمَّ أَنْتَ الْأَوَّلُ فَلَيْسَ قَبْلَكَ شَيْءٌ ، وَأَنْتَ الْآخِرُ فَلَيْسَ بَعْدَكَ شَيْءٌ ، وَأَنْتَ الظَّاهِرُ فَلَيْسَ فَوْقَكَ شَيْءٌ ، وَأَنْتَ الْبَاطِنُ فَلَيْسَ دُونَكَ شَيْءٌ اقْضِ عَنَّا الدَّيْنَ
اے اللہ! تو پہلا ہے، تجھ سے پہلے کچھ نہیں اور تو ہی آخری ہے، تیرے بعد کچھ نہیں اور تو ہی ظاہر ہے، تیرے اوپر کچھ نہیں۔
اور تو ہی باطن ہے، تیرے نیچے یا تجھ سے چھپ کر کچھ نہیں۔
صحيح مسلم – كتاب الذكر والدعاء والتوبة والاستغفار – باب ما يقول عند النوم وأخذ المضجع:2713
یہ دعا واضح کرتی ہے کہ اللہ ہر جہت سے مخلوق سے بالکل جدا ہے۔ لہذا وحدت الوجود اسلامی عقیدہ نہیں بلکہ باطل اور گمراہی ہے۔ توحید یہی ہے کہ اللہ اپنی ذات، صفات اور الوہیت میں منفرد اور جدا ہے۔ بندے کا فرض ہے کہ اللہ کو خالق مانے اور باقی سب کو مخلوق، اور ایمان کی حفاظت اسی میں ہے۔